गोपालमान श्रेष्ठको पार्थिव शरीरमा नेपाली कांग्रेसको झण्डा ओढाइयो

1.1k Shares

काठमाडौं । नेपाली कांग्रेसका वरिष्ठ नेता तथा पूर्वउपप्रधानमन्त्री गोपालमान श्रेष्ठको पार्थिव शरीरमा कांग्रेसका सभापति गगनकुमार थापाले पार्टीको झण्डा ओढाएर अन्तिम श्रद्धाञ्जलि अर्पण गरेका छन्।

श्रेष्ठको निधनपछि बुधबार बिहान उनको पार्थिव शरीर ललितपुरस्थित पार्टीको केन्द्रीय कार्यालय सानेपामा राखिएको थियो, जहाँ थापाले पार्टीका तर्फबाट सम्मान प्रकट गरेका हुन्।

श्रेष्ठको पार्थिव शरीरमा पार्टीको झण्डा ओढाइएपछि कांग्रेसका नेता, कार्यकर्ता, शुभेच्छुक तथा विभिन्न दलका प्रतिनिधिहरूले पुष्पगुच्छा अर्पण गर्दै श्रद्धाञ्जलि व्यक्त गरेका थिए। लामो समय नेपाली कांग्रेसको संगठन निर्माण, लोकतान्त्रिक आन्दोलन र राज्य सञ्चालनमा उनले पुर्‍याएको योगदानको स्मरण गर्दै नेताहरूले उनको निधनलाई अपूरणीय क्षति बताएका छन्।

सभापति थापाले श्रेष्ठले लोकतन्त्रको संरक्षण, पार्टी संगठन सुदृढीकरण र राजनीतिक नेतृत्व विकासमा खेलेको भूमिका सधैं प्रेरणादायी रहने बताएका छन्। पूर्वसभापति शेरबहादुर देउवाले पनि श्रद्धाञ्जलि व्यक्त गर्दै लोकतान्त्रिक आन्दोलनमा श्रेष्ठको योगदान इतिहासमा सदैव स्मरणीय रहने उल्लेख गरेका छन्।

गोपालमान श्रेष्ठ ७९ वर्षका थिए। उपचारका क्रममा उनको निधन भएको हो। उनी नेपाली कांग्रेसका कार्यवाहक सभापति, उपप्रधानमन्त्री तथा विभिन्न मन्त्रालयको जिम्मेवारी सम्हालिसकेका अनुभवी नेता थिए। सानेपामा श्रद्धाञ्जलिपछि उनको पार्थिव शरीर अन्त्येष्टिका लागि पशुपति आर्यघाट लगिएको छ।

सम्बन्धित समाचार