सुकुमबासीको सडक आन्दोलन, वैकल्पिक मार्गको माग

1.2k Shares

काठमाडौँ । वर्षासँगै पटक–पटक अवरुद्ध हुँदै आएको बीपी राजमार्गको दिगो समाधानको माग गर्दै काभ्रेको रोशी गाउँपालिका–१२ कालापानीका सुकुमबासीले शनिबार सडक अवरुद्ध गरेका छन्।

स्थानीयवासीले राजमार्ग पुनर्निर्माणमा भइरहेको ढिलाइ र वर्षा लाग्नेबित्तिकै सडक अवरुद्ध हुँदा दैनिक जीवन कष्टकर बनेको भन्दै आन्दोलनमा उत्रिएका हुन्। उनीहरूले सडकमा धर्ना दिँदै केहीबेर सवारी आवागमन समेत ठप्प पारेका थिए।

प्रदर्शनकारीले अस्थायी डाइभर्सनमा मात्र निर्भर नभई स्थायी समाधान गर्न, प्रभावित बस्तीको सुरक्षाको व्यवस्था गर्न र वैकल्पिक सडकको निर्माण अघि बढाउन सरकारसँग माग गरेका छन्। स्थानीयका अनुसार राजमार्ग पटक–पटक बन्द हुँदा आवतजावत, व्यापार तथा दैनिक उपभोग्य सामग्रीको आपूर्तिमा समेत समस्या हुने गरेको छ।

बीपी राजमार्ग २०८१ सालको बाढीपहिरोपछि सबैभन्दा बढी प्रभावित सडकमध्ये एक हो। अहिले विभिन्न खण्डमा पुनर्निर्माणको काम अघि बढिरहेको भए पनि मनसुनका बेला रोशी खोलाको बाढी र पहिरोका कारण सडक बारम्बार अवरुद्ध हुने गरेको छ।

सुरक्षा निकाय र स्थानीय प्रशासनले आन्दोलनरत पक्षसँग संवाद गरी सडक खुलाउने प्रयास गरेको जनाएको छ। आन्दोलनका कारण केही समय सवारी साधन रोकिनुपरे पनि पछि आवागमन क्रमशः सञ्चालनमा ल्याइएको बताइएको छ।

सम्बन्धित समाचार