नेपालमा इयुको नयाँ राजदूतको आगमन

1.4k Shares

काठमाडौं । नेपालका लागि युरोपेली संघ (इयु) का नवनियुक्त राजदूत चार्ल्स ह्विट्ली काठमाडौं आइपुगेका छन्। उनले नेपाल–युरोपेली संघबीचको सम्बन्धलाई थप सुदृढ बनाउँदै सहकार्यका नयाँ क्षेत्र पहिचान गर्ने प्रतिबद्धता व्यक्त गरेका छन्।

काठमाडौं आगमनपछि राजदूत ह्विट्लीले नेपाल र इयुबीचको लामो समयदेखिको मैत्रीपूर्ण सम्बन्धलाई अझ बलियो बनाउने आफ्नो प्राथमिकता रहेको बताएका छन्। उनको कार्यकालमा विकास साझेदारी, आर्थिक सहकार्य, जलवायु परिवर्तन, शिक्षा, रोजगारी तथा आपसी हितका विषयमा सहकार्यलाई थप प्रभावकारी बनाउने अपेक्षा गरिएको छ।

यसअघि नेपालका लागि इयुकी राजदूत भेरोनिक लोरेन्जोले आफ्नो कार्यकाल पूरा गरी नेपालबाट बिदा भएकी थिइन्। उनले अगस्ट १८ मा परराष्ट्रमन्त्री शिशिर खनालसँग बिदाइ भेट गरेकी थिइन्। भेटमा नेपाल–इयु सम्बन्ध, जलवायु कार्य, श्रम तथा सुरक्षित आप्रवासन, आर्थिक संक्रमण र सांस्कृतिक आदानप्रदानलगायत विषयमा छलफल भएको थियो।

लोरेन्जोले नेपालमा रहँदा हिमाली वातावरण तथा पानी संरक्षणका क्षेत्रमा सहकार्य विस्तार गर्न इयुको चासो रहेको बताएकी थिइन्। त्यस्तै, नेपालले अतिकम विकसित मुलुकबाट स्तरोन्नतिको प्रक्रियालाई अघि बढाउँदा आवश्यक सहयोग उपलब्ध गराउन इयु तयार रहेको उनको भनाइ थियो।

इयु नेपालका प्रमुख विकास साझेदारमध्ये एक हो। इयुले लोकतान्त्रिक शासन, समावेशी आर्थिक विकास, शिक्षा, दिगोपन तथा जलवायु क्षेत्रमा नेपालसँग निरन्तर सहकार्य गर्दै आएको छ। पछिल्लो समय बाढीपहिरोजस्ता विपद्का घटनामा समेत इयुले नेपाललाई मानवीय सहयोग उपलब्ध गराउँदै आएको छ।

यसैबीच, इयुले नेपालमा आएको बाढीबाट प्रभावित नागरिकलाई सहयोग गर्न २० लाख युरो मानवीय सहायता उपलब्ध गराउने घोषणा गरेको छ।

नयाँ राजदूत ह्विट्लीको आगमनसँगै नेपाल र इयुबीचको आगामी सहकार्य, विशेषगरी विपद् व्यवस्थापन, जलवायु परिवर्तन, आर्थिक विकास, शिक्षा तथा श्रम आप्रवासनका क्षेत्रमा थप केन्द्रित हुने अपेक्षा गरिएको छ

सम्बन्धित समाचार