मधेश प्रदेशमा नयाँ सरकार गठनका लागि दाबी पेश गर्ने समय शुक्रबार साँझ ५ बजेसम्म रहेको छ। तर, यसबारेमा को मुख्यमन्त्री हुने भन्ने अझै स्पष्ट हुन सकेको छैन।
प्रदेश प्रमुख डा. सुरेन्द्र लाभले संविधानको धारा १६८(२) बमोजिम नयाँ सरकारका लागि दाबी पेश गर्न समयसीमा तोकेका हुन्। यो समयसीमा अन्तिम मानिएको छ।
एमाले बाहेक सात दलीय गठबन्धनमा रहेका नेपाली कांग्रेस र लोकतान्त्रिक समाजवादी पार्टी (लोसपा) ले सरकारको नेतृत्वमा दाबी नछोडेकाले नयाँ मुख्यमन्त्रीको नाममा सहमति हुन सकेको छैन।
सात दलीय गठबन्धनमा नेपाली कांग्रेस, जनता समाजवादी पार्टी (जसपा) नेपाल, जनमत पार्टी, लोसपा, नेकपा माओवादी केन्द्र, नेकपा (एकीकृत समाजवादी) र नागरिक उन्मुक्ति पार्टी सहभागी छन्। यसबीच बसेका बैठकहरूमा पनि सहमति जुट्न सकेको छैन।
मुख्यमन्त्री पदका मुख्य दावेदार नेपाली कांग्रेस संसदीय दलका नेता कृष्णप्रसाद यादव र लोसपाका नेता जितेन्द्र सोनल रहेका छन्। दुवैले विभिन्न दलहरूसँग सक्रिय संवाद गर्दै छन्। यसअघि पनि मुख्यमन्त्री भएका सोनललाई बाहेकका दलहरू प्रायः यादवको पक्षमा छन्।
जसपा संसदीय दलका नेता सरोजकुमार यादवले शुक्रबार दिउँसो २ बजे सात दलले संयुक्त रूपमा प्रदेश प्रमुख कार्यालयमा दाबी पेश गर्ने बताए। उनले सरकार गठन सात दलीय गठबन्धनको भावना अनुसार हुनेछ र मुख्यमन्त्रीको शपथसँगै सबै दलका मन्त्रीहरूले पनि शपथ ग्रहण गर्ने अपेक्षा व्यक्त गरे।