स्मार्ट टेलिकम लिलामी विवादपछि एनआईएमबीको प्रतिक्रिया– ‘सबै प्रक्रिया कानुनी दायरामै’

1.3k Shares

नेपाल इन्भेस्टमेन्ट मेगा बैंक (एनआईएमबी) ले आफ्नो प्रमुख कार्यकारी अधिकृत (सीईओ) ज्योतिप्रकाश पाण्डेलाई प्रहरीले नियन्त्रणमा लिएपछि विभिन्न सञ्चारमाध्यममा आएका समाचारप्रति ध्यानाकर्षण भएको जनाएको छ । बैंकले शुक्रबार विज्ञप्ति जारी गर्दै स्मार्ट टेलिकमसँग सम्बन्धित सम्पत्ति लिलामी प्रक्रिया प्रचलित कानुनअनुसार गरिएको दाबी गरेको हो ।

नेपाल प्रहरीको केन्द्रीय अनुसन्धान ब्युरो (सीआईबी) ले स्मार्ट टेलिकम प्रकरणमा अनुसन्धानका लागि पाण्डेलाई नियन्त्रणमा लिएको थियो । स्मार्ट टेलिकमको सम्पत्ति लिलाम बिक्री तथा घरबहाल र विद्युत् महसुल भुक्तानीसँग सम्बन्धित विषयमा अनुसन्धान भइरहेको जनाइएको छ ।

बैंकले बैंक तथा वित्तीय संस्था सम्बन्धी ऐन २०७३ र सुरक्षित कारोबार ऐन २०६३ अनुसार कर्जा असुली प्रक्रियाअन्तर्गत लिलामी गरिएको स्पष्ट पारेको छ । बैंकका अनुसार गत असोजमा प्रकाशित सूचनाअनुसार स्मार्ट टेलिकमसँग सम्बन्धित उपकरण तथा सामग्री लिलामी गर्दा ४ अर्ब ६० करोड रुपैयाँ उठेको थियो । त्यसमध्ये ४ अर्ब २२ करोड रुपैयाँ सहवित्तीयकरण कर्जा चुक्ता गरिएको र बाँकी ३८ करोड रुपैयाँ बैंकको अर्नेस्ट मनी अक्सन खातामा रोक्का रहेको जनाएको छ ।

उक्त रकम घरबहाल, विद्युत् महसुललगायत स्मार्ट टेलिकमले तिर्न बाँकी दायित्व भुक्तानीका लागि राखिएको र सम्बन्धित निकायबाट प्रमाणसहित माग आएपछि क्रमशः भुक्तानी गरिने बैंकले जनाएको छ ।

अनुसन्धानका लागि आवश्यक सबै कागजात तथा विवरण सम्बन्धित निकायलाई उपलब्ध गराइएको र आगामी दिनमा पनि सहयोग जारी रहने प्रतिबद्धता बैंकले व्यक्त गरेको छ ।

सम्बन्धित समाचार